BUTUAN CITY – Padayong gisubay sa kapulisan ang CCTV sa lugar aron i-verify ang suspek sa pagpamusil sa usa ka retiradong sundalo sa San Francisco, Agusan del Sur.
Naila ang biktimang si retired TSgt. Esabelo Paculba nga kanhi nadistino sa 36 Infantry Battalion, PA, negosyante ug kopra ug residente sa New Leyte, Barangay Awa, Prosperidad, Agusan del Sur.
Sumala ni PO2 Paulin John Loha, handling investigator sa San Francisco municipal police station, gikan sa bangko ang asawa ni Paculba, diin kini nag withdraw ug salaping cash nga nagkantidad ug 153 mil pesos.
Pasulod na unta ang magtiayon sa karinderya sa old market sa Prk. 2 Brgy 2 sakop sa maong lungsod aron mani-udto dihang gibunlot sa mga suspetsado ang bag sa asawa.
Gitabangan sa biktima ang asawa hinungdan nga gipusil kini sa makatulo ka higayon diha sa iyang nawong og lawas resulta sa iyang hinanaling kamatayon.
Pakyas ang mga suspetsado pagkuha sa kwarta human nga nakaresponde gilayon ang nakasibilyan lang nga off duty police nga si SPO2 Urbiztundo kinsa maoy nakigpinusilay sa mga suspetsado.
Dinhi na nagkaguliyang ang mga tawo hinungdan nga nakaikyas ang riding in tandem nga mga suspetsado kinsa padayon pang gipangita. (Melody Valledor)
