BUTUAN CITY – Himoon ugmang adlawa, Hulyo 1, Sabado, ang Grand Launching and Rollout sa Buhay ay Ingatan, Droga’y Ayawan kon BIDA Program sa Agusan Del Norte ug Butuan City.
Sigon ni Ray Grigory Jaranilla, Chief Local Government Monitoring sa Department of Interior and LOcal Government kon DILG-Caraga, sugdan ang maong programa pinaagi sa fun run sa alas 4:00 sa kaadlawon gikan sa City Sports Complex sa Barangay Libertad ning siyudad ngadto sa covered court sa kapitolyo sa Agusan Del Norte diin dunay himoong programa nga laumang tambongan ni DILG Secretary Benhur Abalos Jr. kauban ang iyang mga assistants og undersecretaries.
Himoon ang ground breaking ceremony sa Butuan City Central Police Station sa Barangay Villa Kananga nga sundan sa program proper sa usa ka hotel ning siyudad pasado alas 10:00 sa buntag diin dunay gi-imbitar nga mga gobernador samtang motambong usab ang tanang mayor sa kalungsuran ning rehiyon sa Caraga.
Pasabot pa ni Jaranilla, ang BIDA Program mao ang parte sa gipirmahan ni kanhi Pangulong Rodrigo Duterte nga estratehiya aron mabatukan ang ilegal nga drogas og gipadayun kini sa kasamtangang administrasyon.
Sumala sa opisyal, ang mga LGUs na ang mahimong frontline sa programa tungod kay sila man ang nahibalo sa problema sa ilegal nga drogas sa ilang lugar.
Gidasig nalang niini ang ubang kalungsuran nga mohimo sa ilang launching sa BIDA Program.
