BUTUAN CITY – Tungod sa padayong hulga nga hatud sa coronavirus disease-2019 kon Covid-19 gisibog sa usa ka kindergarten school sa Gwangju, South Korea ngadto sa Marso 9 ang graduation ceremony nga gitakda unta ugmang adlawa.
Sa eksklusibong pakighinabi sa Bombo Radyo Butuan, gipadayag ni Joy Enriquez-Lee, lumad nga taga-Buenavista, Agusan del Norte ug permanent resident na sa Gwangju City, South Korea, sukad sila nakabalik sa South Korea niadtong Pebrero 9 gikan nagbakasyon dinhi sa Pilipinas, wala na sila naggawas pa tungod sa kahadlok nga mataptan sa makamatay nga virus.
Gibutyag ni Lee nga nga duha ka semana na sila karong wala’y gawasay sa iyang duha ka mga anak sa ilang balay gawas lang sa iyang Koreanong bana nga kinahangang mutrabaho.
Matag—abot matud pa sa iyang bana, ilabay gilayon niini ang iyang suot nga face mask daypong kaligo aron masigurong dili makasulod sa ilang panimalay ang virus.
Dugang pa niini nga gikan sa elementarya, sekondarya og kolehiyo, suspendido ang tanang klase gawas lang sa mga kindergarten nga mamahimo pa gihapong makatungha aron duna’y maka-atiman higayong mutrabaho ang ilang mga ginikanan. Ang unta graduation ceremony sa iyang anak nga gitakda ugma, gisibog na ngadto sa Marso 9 depende pa kung mulurang na kini.
Gani sa ilang lugar, sa siyam ka mga Koreanong gi-quarantine, pito ang kumpirmadong nataptan sa maong virus samtang negatibo ang duha. Gidugang pa niini nga nag-panic matud pa ang Filipino community sa ilang lugar tungod sa exaggerated posts diha sa social media.
Bugtong hinagiban na lang nga ilang gikuptan karon mao ang pag-ampo og dili paggawas sa ilang mga balay rason nga hastang mingawa karon sa ilang lugar.
