BUTUAN CITY – Suspendido na ang klase sa tanang lebel sa mga pampubliko ug pribadong tunghaan sa probinsya sa Surigao del Norte karong adlawa, Lunes, Oktubre 13.
Kini ang gikumpirma ni Gov. Lyndon Barbers sa Surigao del Sur human sa magnitude 6 nga linog nga mi-igo sa lungsod sa Cagwait niadtong Oktubre 11 bandang alas 10:32 sa gabii, lakip na ang mga kusog nga aftershocks nga nasinati kagahapon hinungdan sa pag-isyu sa tsunami warning ug sa padayon nga mga aftershock.
Tumong sa maong lakang ang paghatag og igo nga panahon alang sa mga Disaster Risk Reduction and Management (DRRM) focal persons, mga engineer, ug uban pang technical experts aron sa pag-inspeksyon sa kalig-on sa mga estruktura sa mga tunghaan ug masiguro ang kaluwasan sa dili pa kini gamiton pag-usab.
Subay niini, kon ideklarar nga luwas nang gamiton ang maong mga tunghaan, awtomatikong tangtangon ang suspensyon sa klase.
Magpabiling suspendido ang klase sa mga tunghaan nga adunay kadaot o nanginahanglan pa og dugang nga assessment hangtod ideklarar nga luwas na kini gamiton.
Subay niini, gitahasan usab ang mga Municipal ug City DRRMCs sa pagpatuman sa inspeksyon sa tanang educational institutions sa ilang tagsa-tagsa ka nasakupan.
Ang mga DRRM focals person gitahasan usab sa pagsubmite sa ilang inspection ug safety status report ngadto sa Provincial DRRM Operations Center.
Padayon pa usab ang emergency monitoring sa lokal nga panggamhanan sa Surigao del Norte, samtang posible pa ang mga aftershock.
Gidasig ang publiko nga magpabiling mabinantayon, mosunod sa mga safety protocol, ug magtinabangay sa mga inspection team ug lokal nga mga awtoridad.
