BUTUAN CITY -Nagtingkagol karun sa Talacogon Municipal Police Station ang gitoohang commanding officer sa militia ng bayan sa NPA human kini nasikop sa niaging alas 3:25 sa buntag sa Talacogon, probinsiya sa Agusan Del Sur.
Naila ang nadakpan nga si Roger Salinas Gonzales, commanding officer sa militia ng bayan sa Guerilla front committee 8 sa northeastern mindanao regional command.
Nakuha gikan sa suspetsado ang .38 nga kalibre sa pistola nga puno sa buhing bala.
Nasikop ang suspek base na sa gi-implimentar nga search warrant sa paglapas sa RA 10591 kon Comprehensive Firearms and Ammunition Regulation Act.
Ang maong operisyon gihimu sa hiniusang puwersa sa Alpha Company sa 26th Infantry Battalion, Philippine Army, Talacogon Municipal Police Station ug Agusan del sur police provincial office.
Una nang na-aresto sa mga personahe sa Sibagat Municipal Police Station ug Agusan del Sur Provincial Mobile Force Company sa suporta usab sa 3rd Special Force Battalion ang front secretary ug political officer sa Communist Party of Philippines-New People’s Army kon CPP-NPA.
Naila ang suspek nga si Pablito Campos Jr., 43-anyos nga taga Brgy. Diatagon, Lianga, Surigao del Sur kansa nadakpan sa niaging alas 9:00 sa buntag sa El Rio, Sibagat, Agusan del Sur.
