BUTUAN CITY – Posibleng gitiro sa mga kanhi ka-ubanan niini sa walhong grupo ang usa ka ginang nga gipusil-patay ning mi-aging alas-6:20 sa gabii sa Purok 2, Brgy. Anticala ning siyudad sa Butuan.
Sa pakighinabi sa Bombo Radyo Butuan, gi-ila ni PCaptain Charles Evan Gatchalian, station commander sa Butuan City Police Station 4 ang biktimang si Alma Nalugon Pajaron, 51-anyos, mag-uuma, residente sa maong dapit.
Gika-ingong naghikay matud pa sa ilang panihapon ang ginang gikan nagmerkado kondiin diha kini gitiro sa bangag sa ilang lababo sa pipila ka higayon. Gidala pa kini sa Butuan Medica Center apan gideklara kining dead-on-arrival sa attending physician.
Wala matud pa’y kaaway ang biktima sa ilang lugar rason nga gitu-uhang ang pagbalik niini sa sabakan sa balaud human mibiya sa walhong kalihukan, ang posibleng usa sa mga motibo sa kremin.
