BUTUAN CITY – Nakatilaw og dakong kaparatan ang Gilas Pilipinas sa mga kamot sa Lebanon sa nagpadayong Doha International Cup in Qatar, kagabii.
Human nakumpleto nila ang paggukod sa kalaban nga Qatar sa iskor nga 74-71 sa unang dula, ning higayona nahutdan sila og gasolina sa pag-arangkada batuk sa Lebanon diin sila gilubong og 21 puntos pinaagi sa iskor nga 75-54.
Tungod niini nasayang ang double-double performance ni Justine Brownlee nga dunay 21 puntos iog 11 ka rebounds.
Mianindot pa ang dula sa Gilas hangtud sa pagtapos sa ikatulong kwarter human napakunhod ngadto sa usa ka puntos nalang ang labaw sa Lebanon,51-50. Apan sa 4th quarter dinhe na gidimalas pag-ayu ang Gilas diin miiskor lang sila og 6 puntos samtang 24 puntos ang napasulod sa Lebanon.
Bisan sa mga garbage time, makitang naglisud gihapon sa pag-score ang Gilas. Karung dunay 1-1 win-less record ang Pilipinas, naglaum kini nga mahimong positibo ang pagtapos sa ilang kampanya sa ikatulo og katapusang window sa FIBA Asia Cup Qualifiers diin ilang makalaban ang Egypt unyang alas 1:30 sa kaadlawon.
