BUTUAN CITY – Gipasabot ni Eldy David – information officer sa Butuan City government ang pag-utang sa lokal nga kagamhanan ning siyudad og 965-milyunes pesos sa Development Bank of the Philippines kon DBP.
Sa pakighinabi ning sibyahan, gipadayag ni David nga ang maong loan tipik lang sa 1.3-bilyunes pesos nga credit line nga mamahimong ma-avail sa lokal nga kagamhanan.
Gawas pa, gitugot na usab kini sa Sangguniang Panlungsod pinaagi sa gipalabang nga SP Resolution No. 5408-2017.
Gipasabot pa ni David nga dili mahimong gamiton sa laing katuyuan ang maong kwarta tungod kay gitagana lang kini isip jumpstart sa mga proyektong imprastraktura.
Gipasabot ni David nga 250-milyunes pesos sa maong pundo gamiton alang sa pagpalit og mga heavy og light equipment sama sa 43 ka mga mini dump trucks nga ipang-apod apod ngadto sa mga barangay aron magamit sa pagkolekta nila og mga basura.
Anaa pa ang pagpalit nila og napulo ka 10-wheeler dump trucks aron mahimong tubag sa problema sa kabaranggayan alang sa mga nagproblema sa ilang lubakong kalsada og uban pang kagamitan.
Duna usa’y igahin nga 200-milyunes pesos nga gamiton pagpatukod og bag-ong 200-bed capacity building sa Butuan Medical Center og lain pa ang alang sa pagkompleto sa South Supermarket nga gila-umang matapos ning tuiga aron ibalhin una ang Langihan Public Market alang sa himuon usab nga repair.
Wala pa’y labot ang 50-milyunes pesos alang sa pag-construct sa Material Recovery Facility kon MRF aron didto himuon ang final sorting sa mga gi-segregate nga basura.
Maggahin usab ang city government og dugang 250-milyunes pesos alang sa pag-construct sa disaster command center ilabina nga ang Butuan nagtungtong sa faultline sa ingon mapadayon ang pagserbisyo sa katawhan ilabina panahon nga duna’y dakong damyos ang siyudad panahon sa kalamidad sama sa dakong linog. (Beth Ruiz)
