BUTUAN CITY – Nagpahimangno ang Department of Science and Technology (DOST) sa katawhan batok sa epekto sa bagyong Nando nga makaapekto sa dagkong bahin sa Luzon. Sumala ni DOST-PAGASA Assistant Weather Services Chief Chris Perez, dako ang posibilidad nga magdala kini og kusog nga pag-ulan ug hangin tungod sa padayon nga pagkusog niini samtang anaa pa sa sidlakang bahin sa kadagatan sa nasud.
Dugang ni Perez, posible nga makaabot na kini ugma sa typhoon category ug magpadayon pa ang kakusog samtang nagalihok sa kadagatan. Karong Lunes usab, posible nga mahimo pa kining supertyphoon kung magpadayon ang kusog—ug mahimong unang supertyphoon nga masinati sa Pilipinas karong tuiga.
Wala usab giwagtang sa weather bureau ang posibilidad nga mo-landfall ang bagyo sa bisan unsang isla nga sakop sa Calayan o Babuyan Group of Islands sa Northern Cagayan. Sumala pa ni Perez, posible kini mahitabo sa gabii sa Lunes o sa buntag sa Martes sa sunod semana. Giklaro usab sa Assistant Weather Services Chief nga tungod sa kadak-on sa area nga posibleng maapektuhan, kinahanglan nga mag-andam ang mga probinsya sa Cagayan, Isabela, Batanes, ug uban pang kasikbit nga mga lugar tungod sa kusog nga hangin ug ulan nga dala sa bagyo.
Posible nga moabot kini sa Wind Signal No. 5, ang pinaka taas nga signal alang sa hangin. Gilauman nga ugma, ipasaka na usab ang Signal No. 1 sa pipila ka lugar sa Northern Luzon.
