BUTUAN CITY-Gikalingawan online ang usa ka gasolinahan sa Russia human nibalik ngadto kanila ang ilang gilusad nga “marketing promotion” niadtong 2016.
Sa tinguha nga makadani og daghang kustomer ug mahimong trending sa social media, misaad ang maong gasolinahan og full tank diin libreng gasolina alang sa bisan kinsa nga moadto sa ilang istasyon, apan adunay challenge nga buhatan aron maka-avail sa libreng gasolina. Ang gikinahanglan magsul-ob og bikini.
Nahugyaw ang tag-iya sa gasolinahan human gidagsa sa kalalakin-an aron magpa gasolina diin naka bikini lang kini, nagtoo ang tag-iya nga babae lang ang motuman sa challenge apan, wala damha gi-challenge accepted usab sa mga lalaki ang maong hagit. Samot usab nga nahugyaw ang publiko human nga nag-high heels pa gyud aron masunod ang “rules” sa promo.
Tungod sa maong promo, gidagsa kini sa mga kustomer hinungdan sa taas nga linya nga niabot pa sa pikas kalsada. Gani tungod sa daghang nagpa gasolina, human sa tulo ka oras gihunong na ang promo.
Napamatud-an sa maong hitabo nga kon ang balaod sa promo literal kaayo ang pagkasulat, literal sab kini nga sundon sa mga tawo—bisan pa kon magsul-ob pa sila og sapot nga dili para sa ilaha.
