BUTUAN CITY – Naka-confine pa sa ospltal ang kadaghanan pasahero sa usa ka multicab human kini gibanggaan sa usa ka elf truck sa National Highway sa Purok-8, Barangay Bancasi, Butuan City alas-5:15 sa hapon ning nakalabay nga adlaw.
Lakip sa mga naka-confine pa karon sa ospital ang driver sa elf truck nga si Glenn Helig Vicente, 42-anyos, residente sa Montevista Subd., Brgy. San Vicente, Butuan City kinsa under observation pa human nawad-an og panimuot human sa insidente.
Samtang lakip usab sa mga pasaherong na-confine ang usa ka 9-anyos nga batang lalaki nga nagrabehan kinsa igsuon sa maong usa ka two-weeks old nga masuso nga milagrong wala na-unsa human sa aksidente, apan naka-angkon og mga bukol ug bun-og sa kalawasan ang inahan ug amahan niini.
Na-confine ang usa ka 15-anyos nga dalagita nga maoy katapusang nakuha sa multicab.
Aduna nay nahitabong pakig-istorya ang tag-iya sa elf truck ingon man sa tag-iya sa multicab ug ngadto sa kabanay sa mga pasahero kondiin misaad ang tag-iya sa sakyanang nakabangga nga ilang abagahon ang tanang galastuhon ug damyos ingon man sa pagpalubong sa duha ka nakalas nga sila Alegi Ybanez Bawiga 21-anyos ug residente sa Matabao, Buenavista, Agusan del Norte, kinsa driver sa multicab ug ang pasahero niini nga si Irish Salva, 45-anyos residente sa Barangay Dumalagan ning siyudad sa Butuan.
