BUTUAN CITY – Gisaksihan nila Department of Environment and Natural Resources kon DENR Secretary Roy Cimatu og Department of Interior and Local Government kon DILG Sec. Eduardo Año ang pagbaklas sa pipila pa sa 391 ka establisamiento sa Siargao Island nga natumbok sa Task Force Siargao nga nakalapas sa environmental law sa nasud.
Unang nasampulan ang Cabuntog function hall nga gipanag-iyahan sa local nga kagamhanan sa General Luna sa Brgy. Poblacion 5.
Mitabang na lang ang LGU pagbaklas sa pipila ka parte sa resort nga milapas sa 25-meter easement zone gikan sa baybayon hangtod sa ilang establisamiento
Apil sa giguba ang dining area sa usa ka hotel tungod kay duol na kini sa baybay.
Gibutyag ni DENR Caraga Regional Director Felix Alicer sa eksklusibong pakighiabi sa Bombo Radyo Butuan nga ang uban sa maong mga establisamiento duna na’y compliance apan gi–require silang magbaton og final disposal facilities.
Gihatagan usab sila og tulo ka buwan nga deadline human na-isyuhan og niotice of violation og gimanduang boluntaryong mag-demolish nga kung dili sundon, pasakaan sila og kasong paglapas sa Water Code of the Philippines.
Sumala sa opisyal, gawas sa demolition, giablihan usab kagahapong adlawa ang pagtugot sa temporaryong paggamit sa Residual Containment Area kon RCA samtang wala pay pinal nga disposal facility nga mao matod pa ang problema sa maong isla.
Hinuon gibutyag sa opisyal nga hanap ang tsansa nga ipasira ang maong isla aron i-rehabilitate tungod kay mikooperar man ang mga establishmento sa maong lugar
Katuyuan matod pa niini nga malikayan sa Siargao Island ang nasinatian sa isla sa Boracay nga gisira alang sa rehabilitasyon.
