BUTUAN CITY – Gipagawas sa Philippine Statistics Authority (PSA) ang pinakabag-ong datos gikan sa 2025 National Demographic and Health Survey (NDHS) nga nagpakita sa padayon nga pagkunhod sa fertility rate sa mga Pilipina ngadto sa 1.7 ka anak matag-usa —ang pinakagamay nga natala sa kasaysayan.
Gikan sa 4.1 ka anak matag-babaye niadtong 1993, padayon nga mikunhod ang fertility rate sa mi-aging mga dekada.
Sa karon, mas ubos na kini sa replacement level nga 2.1 nga gikinahanglan aron mapadayon ang kasamtangang populasyon, nga naghatag og pangutana kung unsaon pagtubo sa populasyon sa nasud sa umalabot.
Sumala sa survey, mikunhod ang fertility rate sa urban ug rural nga mga lugar kondiin ang mga babaye sa siyudad adunay average nga 1.5 ka anak, samtang ang mga anaa sa kabaryohan adunay 2.0 ka anak.
Pinakataas ang fertility rate sa Bangsamoro Autonomous Region in Muslim Mindanao nga adunay 2.4 ka anak matag babaye, gisundan sa Region IV-A (1.3), National Capital Region, ug Negros Island Region (1.4).
Gipakita usab sa survey nga mas nadugay na karon ang desisyon sa mga babaye sa pagpanganak. Pinakakomun nga edad sa pagpanganak kay 25 hangtod 29 anyos, samtang nagpabiling ubos ang adolescent fertility nga 22 ka pagpanganak matag 1,000 ka babaye nga edad 15 hangtod 19.
Mikunhod usab ang teenage pregnancy, nga adunay 4.9% sa mga babaye nga edad 15–19 ang nakasinati og pagbuntis.
Nagpasabot ang survey nga mas daghang Pilipinang babaye karon ang nagpili nga magka gamay ra og anak.
