BUTUAN CITY – Dili tiaw ang gibating kabalaka karon sa usa ka concerned individual ug maoy nagsilbing frontliner sa usa ka investment scam nga mibaniog dinhi sa syudad sa Butuan ingon man sa ubang parte sa Mindanao, human nga siya na ang gipangitaan karon sa mga nag-invest sa ilang kompanya human nga daw wala natuman ang gipasalig nga return of investment tungod sa gihimong binuang sa ilang presidente ug CEO.
Sa eksklusibong pakighinabi ning sibyahan, gipadayag sa wala na lamang magpaila nga vice-president ug nagsilbing frontliner sa K & A Holistic Trading, nga nabalaka siya karon ug maayo sa iyang kahimtang tungod kay daw siya ang naipit karon sa sitwasyon.
Sigon niini nga sa una, nadani siya ug maayo sa maong investment company nga gipanguluhan sa presidente ug CEO niini nga si Kevin Atienza.
Daghan matud pa ug gipasalig kaniya si Atienza maoy hinungdan nga nadani gyud siya ug maayo ug misugot nga tabangan si Atienza sa pagpang-recruit ug mu-invest sa ilang kompanya apan niabot na lamang ang bulan sa Disyembre sa niaging tuig, wala natuman ang nasangpit nga mga gipasalig.
Gidugang pa niini nga isip vice-president sa maong kompanya, siya usab ang dummy sa mga operasyon sa nasangpit nga suspek.
Nagsilbi matud pa siya nga frontliner sa pagdani sa mga tawo nga mu-invest sa ilang kompanya pinaagi sa pag-ingganyo nga kung mu-invest ug kantidad sa kompanya, mutubo kini pag-abot sa pipila ka panahon.
Daghan-daghan na matud pa siya ug na-recruit nga miresulta sa dakong kita ni Kevin Atienza nga muabot na sa minilyon ka pesos.
Sa una, in good faith matud pa ang ilang panglantaw ni Atienza ug misalig gyud siya kaniya. Ang gikaguol na lamang niini sa karon mao ang iyang mga kaubanan sa simbahan, ug ubang mga kaila, nga iyang na-ingganyo kangsa siya na ang gipangita sa karon.
Gipangitaan na matud pa siya sa mga shares sa mga tawo nga iyang na-ingganyo ug mibubo sa ilang puhunan.
Gawas pa niini, gihulga na usab siya nga patyon ni Atienza subay sa ilang pinakaulahing komunikasyon tungod sa maong kontrobersiya. (Mon Aplaya)
