BUTUAN CITY – Magpahigayon og public consultation ugmang adlawa,septembre 5, ang konseho sa Brgy Los Angeles ning siyudad sa Butuan aron matutukan ang balik-balik na nga mga reklamo sa mga residente kalabot sa pagdagsa na usab sa daghang mga langaw apil na sa boundary sa Brgy Sumilijon.
Base sa gipadala nga sulat-pahibalo ni Kapitan Irene Monden dinhi sa sibyahan, himuon ang konsultasyon unyang alas-nueve ning buntaga sa ilang covered court.
Nasayrang tungod sa pag-harvest na usab sa ilang mga abot sa Centro Farm sa may Purok 5, midagsa na usab ang mga langaw sa maong lugar nga naghatag og grabeng kahasol sa inadlaw-adlaw nga gimbuhaton sa katawhan ilabina sa oras sa ilang tingkaon nga gikabalak-an nilang maghatag og kadaut sa ilang panglawas.
Sigon sa residenteng si Cirilina Ebot, dili nila mabangbang ang kadaghan sa mga langaw nga maglupad-lupad ug mutugpa sa bisan asang parte sa ilang balay. Gani bisan og adlawang dako, magtaud sila og moskitero aron malikay sa mga langaw ilabina kung magpatulog siya sa iyang apo apan duna gihapo’y makalusot.
Samtang gipadayag usab ni Rebecca Quiachon sa Brgy Sumilijon ang susamang problema nga balik-balik matud pa nilang masinatian matag-harvest season sa manukan sa ilang lugar.
Gani duna’y higayon nga dihang mihigop siya sa iyang gitimplang kape, wala siya masayod nga nahagbungan na diay kini og langaw kansa diriyot pa niyang matulon.
Panahon usab sa ilang tingkaon, duna matud pa’y usa sa ilang pamilya ang maulahi mukaon aron lang magbugaw og langaw sa ingon dili matugdungan ang ilang mga pagkaon.
Sa pagkakaron, gipadayag ni Rebecca nga ma-abtan pa og duha ka semana gikan sa pag-harvest sa mga manok, adiser mawala ang mga langaw rason nga naglaum silang masolusyunan na kini sa labing daling panahon.
