BUTUAN CITY – Minimal lang ang pagdagsa sa mga langaw sukwahi sa gireklamo sa usa sa mga residente sa Purok 5, Brgy. Los Angeles ning siyudad.
Kini ang tubag ni Eddie Esguerra, ang farm manager sa Sentro Poultry Farm, nga mao matud pa’y hinungdan sa pagdagsa sa mga langaw nga naghatag na og kahasol sa pipila ka mga residente.
Sa eksklusibong pakighinabi sa Bombo Radyo Butuan, gibutyag ni Esguerra nga adiser pa sila nang-harvest sa mga manok ning mi-aging semana, duna na sila’y gihimong fly control spray kada-adlaw aron malikayan ang ingon niini nga reklamo.
Gipadayag pa niini nga atol sa ilang gihimong fly control spray, ang reklamanteng si Allan Peregrino maoy wala magpa-apil niini sa rasong duna matud pa siya’y mga binuhi nga manok bisaya nga dili niya gustong mahilo.
Gawas niini, imposible usab matud pa ang gipasi-atab ni Peregrino nga wala nangamatay ang mga langaw human sa ilang pag-spray tungod kay duna usab sila’y gihatag nga powder nga maoy mas mupatay pa sa langaw kung ila kining ka-unon.
Sukad matud pa sila gipasira sa taga-City Environment and Natural Resources Office niadtong tuig 2022, igmat na sila sa operasyon pinaagi sa pagsunod sa gihatag kanilang mga rekisitos.
Aminado kining ang una nilang operasyon mipalpak rason sa pagdagsa sa mga langaw apan karon, nagsunod na sila sa mga rekisitos nga gipahimo kanila.
