BUTUAN CITY – Dakong kawad-on sa gitawag nga teroristang New People’s Army kon NPA ang pagka-aresto sa usa sa ilang finance officers kagahapon sa alas 2:50 sa hapon sa Barangay Bading ning siyudad sa Butuan.
Sumala pa ni Capt. Anthony Al Pueblas, CMO officer sa 36th Infantry Battalion, Philippine Army, dakong accomplishment sa kapulisan ug militar ang pagkasikop kang Leonida Guao alyas Leah, Ligaya og Laya, ang finance officer sa CPP-NPA Komisyon Mindanao (KOMMID) base sa Warrant of Arrest nga gi-issue sa Regional Trial Court Branch 7, Bayugan City, Agusan del Sur sa kasong murder ilalum sa criminal case number 5809.
Si Guao ang responsable sa pagtukma sa panahon sa koleksyon ug pagpang apod-apod sa nahuthot nga kwarta sa kinatibok-ang Mindanao.
Nadakpan kini sa hiniusang pwersa sa mga elemento sa 402nd Brigade, 401st Brigade, Criminal Investigation and Detection Group kon CIDG-Caraga og PRO-13 sa pagpatuman sa Law Enforcement Support Operation.
Sumala pa ni Capt. Pueblas, ang pagkasikop sa suspetsado nagpasabot lang sa kahugot sa pagbatuk sa NPA nga angayan lang matud pang tawagon nga terorista tungod sa dili maki-angayong binuhatan sama nalang sa brutal nga pagpatay sa CAFGU member sa San Miguel, Surigao Del Sur.
Nanawagan nalang kini sa tanang aktibo pa sa kalihukan nga unta makamata na kini sa kamatooran ilabina sa karun nga seryosong batukan ang NPA aron maprotektahan ang katawhan.
Sa karun, gikustudiya na sa Criminal Investigation ang Detection Group kon CIDG-Caraga ang nadakpang suspetsado. (Rolan Janea)
