BUTUAN CITY – Wala nay kinabuhi dihang napalgan sulod sa ilang panimalay ang usa ka ulitawo, sa Brgy. Villa Kananga ning dakbayan sa Butuan kagahapon sa alas-6:30 ang takna sa buntag kondiin gitu-uhang gikutlo sa maong lalaki kaugalingon niining kinabuhi. Giila lamang ang maong biktima nga si alyas Plong-Plong 23 anyos, ug nagpuyo sa nahisgutang lugar.
Sumala sa inisyal nga imbestigasyon, gikan sa Surigao City ang biktima ug kagahapon lamang sa buntag naka-abot sa ilang panimalay. Nagtoo ang pamilya niini nga nag-relax lang kini tungod kay gikapoy sa iyang biyahe.
Apan nakurat matud pa ang uyoan sa biktima dihang nakita nga nagbitay na kini sulod sa ilang panimalay hinungdan nga dali nila kining gitabang, apan wala na kini kinabuhi. Wala pa usab masayri kung unsay problema o hinungdan nganong nahimo kini sa biktima, rason nga naglibog pa usab ang pamilya niini.
