BUTUAN CITY – Usa ka sundalo ang patay samtang lain pang usa ang samdan human ang nahitabong engkwentro sa may Brgy. Budlingin, Alegria, Surigao del Norte ning milabay’ng gabie.
Sa pakighinabi ning sibyahan, gibutyag ni Lt. Col. Rico Amaro. Commanding officer sa 30th Infantry Battalion, PA, nga bandang alas- 9 ang takna sa gabie, naka-engkwentro sa ilang tropa ang mga sakop sa NPA’s Guerilla Front Committee 16 ilawom sa pagpanguna sa usa ka Ka Ricky.
Sigon ni Amaro, nga nakadawat matud pa ug taho ang mga kasundaluhan nga sakop sa peace and development team sa maong lugar kabahin sa presensya sa mga armadong grupo sa nasangpit nga barangay.
Matud pa nga daw gi-isolate sa maong grupo ang nasangpit nga lugar ug gihimong human shield ang mga nanimuyong lumad. Human sa maong taho, daling nagpatrolya ang mga kasundaluhan nga miresulta sa engkwentro sa duha ka panig.
Apan wa’y swerte tungod kay namatyan matud pa sila ug usa ka kaubanan nga si PFC Rivera ug samaron nga si PFC Dayata. Sa karon, nagpadayon pa ang ilang gihimong operasyon batuk sa rebeldeng grupo.
