BUTUAN CITY – Gipakunhuran na matud pa ang edad sa mga kabataan nga gustong mu-avail sa summer job program sa Department of Education ( DepEd ).
Sa pakighinabi ning sibyahan, gibutyag ni Elizalde Bernalez, regional information officer sa DepEd- Caraga, nga gikan sa naandang 18-anyos nga pinakabatang edad nga pwedeng mu-apply sa Special Program for the Employment of the Student ( SPES ), gipaubsan na kini sa 15-anyos.
Hinuon giklaro niini nga kinahanglan usab nga dili mulapas sa 24-anyos ang pinakataas nga edad sa buot mu-apply niini.
Nag-unang rason matud pa sa maong lakang aron nga matabangan usab sa ilang ahensya ang mga magtutungha nga mupailawom pa sa Senior High sunod school year.
Muabot matud pa sa 40 – working days ang ilungtad sa maong summer job kangsa nagpadayon na sa kasamtangan ang pagpangdawat sa aplikasyon alang niadtong mga interesado.
Mamahimo lamang matud pa nga makig-alayon sa ilang ahensya alang sa pagpakisayod sa lain pang mga rekisitos ug kwalipikasyon sa maong programa.
