BUTUAN CITY – Gipahayag sa World Health Organisation (WHO), sa ilang situation report ang paspas nga pagkuyanap sa Ebola outbreak sa Democratic Republic of the Congo (DRC) diin nakaabot na sa silingang nasod sa Uganda, og ang mga kaso sa impeksyon sa rehiyon nilapas na sa 500 ka kompirmadong kaso.
Ang outbreak, nga gidala sa Bundibugyo virus—usa ka talagsaon ug grabe nga matang sa sakit nga Ebola—miresulta na sa 534 ka kompirmadong kaso ug 93 ka nangamatay sa tibuok Congo ug Uganda sukad niadtong Hunyo 6.
Ang Congo gihapon ang sentro sa transmission, diin natala ang 515 ka kompirmadong kaso ug 91 ka nangamatay.
Ang Uganda nakatala og 19 ka kompirmadong kaso, lakip ang duha ka namatay ug usa ka probable sa nakamatay nga kaso, nga kining tanan sumpay sa epidemiological nga aspeto tungod sa pagbiyahe gikan sa sidlakang Congo o secondary transmission sa mga nakahimamat sa pasyente.
Sumala sa WHO, kini nga sitwasyon nagpakita sa nagpadayong transmission sa sidlakang bahin sa Congo uban ang pagkatag sa laing nasod tungod sa paglihok sa mga tawo ug pagka-expose sa mga pasilidad sa panglawas.
Nasentro sa outbreak ang Ituri Province, nga naglangkob sa hapit 95% sa mga kompirmadong kaso sa Congo, bisan pa nga dunay mga impeksyon nga natala sa North Kivu ug South Kivu.
Nagpahamatngon ang WHO nga ang pagkuyanap niini sa daghang health zones nagpakita sa padayon ug nagkaanam kalapad nga transmission sa maong dapit.
Sumala sa ahensya, ang bag-ohay nga pagsaka sa ihap sa mga kaso tungod sa gipalapdan nga laboratory testing ug pag-proseso sa mga backlog nga sample.
Bisan pa niini, nagpahibalo ang WHO nga duna gihapoy mga bag-ong impeksyon nga nadiskobrehan, nga nagpasabot nga duna pay aktibong transmission chains.
