BUTUAN CITY – Gi-angkon ni Butuan City Councilor Cromwel Nortega – chairman sa Committee on Sports sa Sangguniang Panlungsod, nga dili pa kaayo competitive ang mga triathlon athletes aning syudad alang sa mga national ug international competition.
Sa pakighinabi ning sibyahan, gibutyag ni Nortega nga subay sa ilang obserbasyon, dili pa gyud maakadomina ang mga triathletes ning syudad ang mga dagkong competition sa nasud nga ilang salmotan.
Hinuon, gitin-aw niini nga dili man usab sila mangulahi kay finisher man usab sila sa mga na-apilan nilang mga national ug international competitions rason nga consistent sila sa ilang mga sports program and activities hilabi na ang padayon nila nga pagpahigayon sa mga triathlon series.
Malaumon kini nga sa umalabot nga panahon, adunay taga- Butuan nga mu-dominar niini nga sports dili lang sa national apan apil na sa international level.
Dugang pa niini, ila nang gipangandaman ang ipahigayon nga Iron Man event didto sa syudad sa Davao kungdiin adunay duha ka mga triathlon athletes ning syudad nga planong muapil.
Nasayran nga sa nakalabay’ng mga adlaw, malampusong gipahigayon ang RCL Triathlon Series sa may Brgy. Masao ning syudad sa Butuan. (Mon Aplaya)
