BUTUAN CITY – Suportado ni Maria Ana Lugid, Regional Director sa Department of Tourism kon DOT-Caraga ang usa ka tuig nga pagpasira sa Boracay.
Sigon ni Lugid sa eksklusibong pakighinabi sa Bombo Radyo, angayan lang nga ma-rehabilitate ang lugar aron ma-recover ang ka-anindot sa maong numero unong tourist destination sa nasud.
Sumala pa niini, mas ma-anindot pa ang Boracay paghuman sa usa ka tuig nga pagrehabilitate ilabina sa mga na-abusong lugar.
Alayon niini, gipangandam na ang pagdagsa sa mga torista sa Siargao Island diin sa pagkakarun, halos fully booked na ang mga hotels tungod na usab sa nagkadool na nga summer nga hugot usab nilang gimonitor kauban ang kapulisan.
Nanghinaot nalang si Lugid nga igo ang pasilidad nga mo-akomodar sa mga modagsang torista.
Sunod-sunod usab nga mga convergence meeting ang ilang gipahigayon sa pagpanguna ni Governor Sol Matugas kauban ang ubang mga ahensiya aron sa ingon mahisgutan ang mga planong ipatuman aron sa ingon dili masusama ang Siargao Island sa nahitabo karun sa Boracay.
Lakip sa mga gitutukan ang solid waste management system diin gikalipay niini ang pag-grant sa request nga ekwepo gika sa Japan alang niini.
Samtang aminado ang opisyal nga maka-alarma nga isyu ang nakuhang datos nga sa 125 ka establishemento sa isla, 26 lang niini ang dunay accreditation.
Tungod niini, gipadali usab ang proseso sa mga dokumento aron matabangan ang tanang stakeholders nga dili maglisud sa pag-aplay og permits.
