BUTUAN CITY – Magpatabang na ang Department of Helath kon DOH sa Department of Education kon DEPED alang sa pagpalapnag sa Information Drive ngadto na sa mga kabataan mahituingod sa kadaot nga dala sa mga E-cigarettes kon vape products.
Kini ang gikataho ni Health Secretary Ted Herbosa human masayri nga daghang mga kabatan-onan ang nawili na karon sa pagpalit og mga vapes, dili lang sa mga physical stores kundili lakip na usab sa mga online.
Kini matud pa ang hinungdan nga kinahanglan nang pakusgan sa maong mga ahensya ang information dissemination ngadto sa mga kabatan-onan kontra as mga vapes. Kahibaloan usab matud pa nga nag-anam na og saka ang mga batan-ong nag edad 16 anyos nga nakasinati na og EVALI kon E-cigarette or Vaping Use-Associated Lung Injury.
Dugang sa nasangpit nga opisyal nga magpatabang na sila sa Department of Education sa pag tudlo sa mga kabataan nga ugaling madaot na ang ilahang mga baga, dili na kini maulian pa og tibook kinabuhi na nila kining dalhon.
Gihagit usab ni Sec. Herbosa ang mga ginikanan nga ipahibalo sa ilahang mga anak ang mga health risk sa pag-gamit og e-cigarettes kon vape.
