BUTUAN CITY – Nagmugna na ang Department of Energy (DOE) og usa ka joint task force aron iduso ang plano sa administrasyon nga wagtangon ang system loss charges ug value-added tax (VAT) sa mga bayronon sa kuryente sa mga consumer.
Sumala sa DOE, ang task force gilangkuban sa Energy Regulatory Commission (ERC), National Electrification Administration (NEA), ug mga electric cooperative.
Tumong niini nga tun-an ug iandam ang mga regulasyon ug sugyot-balaodnon nga kinahanglan aron mapatuman ang direktiba ni Pangulong Ferdinand Marcos Jr.
Mahinumdumang sa iyang State of the Nation Address (SONA), gihangyo sa Pangulo sa Kongreso nga amyendahan ang Electric Power Industry Reform Act (EPIRA) aron hingpit nang mawagtang ang system loss charges ug ang kauban niining VAT sa mga electricity bill.
Sigon sa DOE nga tumong sa maong reporma nga mapakunhod ang singil sa kuryente, maprotektahan ang mga consumer, ug mapahapsay ang serbisyo sa sektor sa enerhiya.
Niadtong Hulyo 28, nakigpulong na usab ang DOE sa Energy Regulatory Commission ug Manila Electric Company (Meralco) aron hisgutan ang mga lakang para matuman ang sugyot.
Bisan og nagpahayag ang Meralco og kaandam nga tun-an ang mga operational adjustments nga makatabang aron mapakunhod ang singil sa kuryente.
Gipamugos ni Meralco Chairman ug CEO Manuel V. Pangilinan nga kinahanglang hisgutan kung kinsa ang mosalo sa kantidad sa system loss charges kung hingpit na kining mawala tungod kay mamahimo matud pa kining moabot sa bilyones pesos.
