BUTUAN CITY – Gitahod sa palasyo sa Malacañang ang desisyon sa Sandiganbayan nga nagtugot sa temporaryong kagawasan ni kanhi Senador Bong Revilla Jr.
Mao kini ang reaksyon sa Palasyo sa desisyon sa Sandiganbayan nga nagtugot sa kanhi senador nga makapiyansa og ₱1 milyon.
Sumala ni Palace Press Officer Undersecretary Claire Castro, anaa na karon sa mga prosecutors ang pagbuot kon unsay husto ug angayang legal nga lakang o remedyo nga ilang himuon.
Dugang ni Castro, ang balaod ug ang husto nga proseso kinahanglan kanunay nga mopatigbabaw.
Sa resolusyon nga gipagawas sa Anti-Graft Court, nakalatid nga napakyas ang prosekusyon pagpresentar og igo ug lig-on nga ebidensya aron mapamatud-an ang salaud sa akusado sa kasong falsification of documents nga may kalabutan sa kasong malversation of public funds.
