BUTUAN CITY – Anaa na sa code white alert ang Department of Health tungod sa pagkuyanap karon sa sakit nga mpox sa tibook kalibutan. Sumala ni Dr. Dioharra Aparri, ang Medical Officer IV ug head sa Health Program Support Team sa DOH-Caraga, molungtad ang maong alerto taman sa Disyembre ning tuiga.
Sumala sa opisyal, nga na-disseminate na usab ang maong impormasyon ngadto na sa tanang balay-tambalanan sa Pilipinas ilalum sa Department of Health, ilabina sa City Health ug Provincial Health Offices. Andam na usab ang Emerging & Re-emerging Infectious Disease kon EREID Hospital ning rehiyon kansa mao ang Caraga Regional Hospital sa Surigao City.
Sumala niini, wala’y angay kabalak-an tungod kay well-trained man ang nasangpit nga balay-tambalanan sa tanang Emerging & Re-emerging Infectious Diseases.
Nagpadayon usab ang mga trainings sa mga DOH Hospital staff aron batukan ang nasangpit nga sakit.
