BUTUAN CITY- Giawhag sa Department of Health (DOH) ang katawhan nga magpabakuna aron malikayan ang mga sakit nga mapugngan pinaagi sa bakuna.
Gipasiugda sa ahensya nga ang immunization usa sa labing epektibo nga pamaagi aron maprotektahan ang lawas batok sa grabe nga balatian ug kamatayon.
Libre nga makuha sa mga health centers ug DOH-BUCAS centers ang nagkalain-laing klase sa bakuna alang sa mga bata, estudyante, mabdos nga kababaihan, ug senior citizens.
Lakip sa mga libre nga bakuna mao ang Bacillus Calmette–Guérin (BCG), Hepatitis B, Poliomyelitis vaccine (Polio), Measles, Mumps, and Rubella (MMR), Human Papillomavirus (HPV), Influenza, ug Pneumococcal vaccines.
Gipahimangnoan usab sa DOH nga luwas ug epektibo ang mga bakuna ug mas dako ang gasto kung magkasakit kompara sa pagpabakuna nga makalikay sa seryosong komplikasyon.
Ang ahensya nagpasalig nga padayon ang ilang kampanya aron masiguro nga daghang Pilipino ang maprotektahan batok sa mga sakit nga mahimong makadaot sa panglawas ug makapahamtang og dakong problema sa pamilya ug komunidad.
