BUTUAN CITY – Suportado sa han-ay sa militar ang deklarasyon ni Pangulong Rodrigo Duterte nga terrorist organization ang CCP-NPA.
Sumala ni Capt. Rodolfo Cordero Jr. Civil Military Operation kon CMO officer sa 401st Brigade, Philippine Army, tungod sa sunod-sunod nga pagpangatake ug pagpamatay sa mga rebeldeng New People’s Army kon NPA, sakto lang ang deklarasyon sa pangulo aron aduna na’y lig-on nga basehan sa pagpasaka og kaso sa mga teroristang NPA ug Communist Party of the Philippines kon CPP.
Gikalipay sa militar ang pagtahas ni Duterte sa Department of Justice kon DoJ nga kasuhan ang mga nagsuporta sa NPA-CCP.
Subay sa RA 1168 kon mas nailang Human Security Act, mas pakusgon pa sa militar ang ilang operasyon batok sa NPA ug sa mga nagsuporta niini.
Gibutyag ni Capt. Cordero nga adunay initial record ang militar sa mga alleged supporters nga mga negosyante, politiko ug kompanya kinsa matod pa ilang paningkamotan nga maputol na ang pagsuporta nila ngadto sa teroristang NPA. (Rolan Janea)
