BUTUAN CITY – Napasaka na sa National Bureau of Investigation kon NBI ang kasong illegal logging ngadto sa Department of Justice kon DOJ batuk sa usa ka mayor sa Surigao del Norte nga nag-operate ug bansuhan nga walay permit.
Nag-atubang sa kasong paglapas sa Presidential Decree No. 705, o the Forestry Law of the Philippines si Dapa, Surigao del Norte Mayor Peter Ruaya ug laing tulo pa.
Nasayrang dala ang search warrant sa mga operatiba sa NBI’s Environmental Crime Division kauban ang Department of Environment and Natural Resources kon DENR-Caraga sa dihang gi-ronda ang Sumidlak Mini-Sawmill and Veneering Plant dool sa Agusan River sa Barangay Mat-i, lungsod sa Las Nieves, lalawigan sa Agusan del Norte.
Ang operasyon niadtong Pebrero 23 batuk sa bansuhan nga gipanag-iyahan ni Ruaya misangpot sa pagkakumpiska sa wala madeterminang kadaghanon sa mga round logs sa lauan ug uban pang miscellaneous nga kahoy samtang nadakpan ang tulo ka trabahante niini.
Sa karun wala pa nagpagawas ug pamahayag si Ruaya mahitungod sa giatubang nga kaso.
