BUTUAN CITY – Padayon pa karung gisuta ang hinungdan sa kamatayon sa nadagsang dakong pawikan sa P-3A, Barangay Manapa lungsod sa Buenavista, Agusan Del Norte.
Sa eksklusibong pakighinabi ning sibyahan sa ginganlan ug Ivy, residente sa maong dapit, gibutyag niini nga kapin alas 3:00 sa hapon kagahapon sa dihang napukutan ang pawikan nga sa pagbana-bana pa niini, kapin sa nigo ang kadak-on.
Sumala pa ni Ivy, ang nasangpit nga pawikan nga color yellow, luya na sa dihang nakuha sa pukot ug paglabay sa pipila ka oras hingpit na kining namatay.
Naka-responde na usab ang kapulisan sa ilang lungsod ug taga- Department of Environment and Natural Resources kon DENR aron masuta ang identity sa pawikan lakip na ang hinungdan sa kamatayon niini.
Gipahayag nalang ni Ivy nga ikaduha na kini ka higayon nga dunay dakong pawikan nga nadagsa sa ilang dapit.
