BUTUAN CITY – Gipahugtan pa ni Maria Cristina Cassion, tigpamaba sa Department of Transportation and Railways kon DOTR-Caraga ang security measures kaniya ug sa iyang tibook pamilya human sa nadawat na usab nga hulga sa kinabuhi.
Sumala pa ni Cassion nga ika-upat na kini ka higayon nga nakadawat siya ug hulga diin kung sauna gipaagi lang kini sa text, karun mitawag na gayud kaniya.
Apan giklaro sa opisyal nga business as usual pa gihapon diin padayon gihapon kini sa iyang trabaho sa opisyal aron matuman ang tahas nga gisangon kaniya ni Pangulong Rodrigo Duterte nga seryoso sa pakigbatuk sa mga kolurom operators.
Dako ang pagtoo ni Cassion nga nagsumikad ang hulga sa mga operators sa nadakpang mga sakyanan ilabina sa bus diin muabot sa 20 ka unit ang ilang nadakpan nga wala pa nalukat sa kantidad nga milyones ka pesos.
Kini tungod sa pagsuhol sa usa ka operator kaniya aron lang dili ma-impound ang sakyanan apan iya kining gibalibaran.
Sa karun nakig-alayon na siya sa otoridad og nanghinaot nga ma-trace ang number human niya kini na-save.
Saysay pa sa DOTR-Caraga Official, unang higayon kini niyang nakadawat ug tawag nga nanghulga sa iyang kinabuhi.
Kinahanglan matud pa niya karun nga mag-amping og mag-ma-igmat og labaw sa tanan ang mag-ampo sa Ginoo.
Subay na usab sa padayong pakigbatuk sa kolurom operators, aminado ang opisyal nga daghan ang na-igo og nasuko sa maong kampanya.
Apan giklaro usab niini nga gipaningkamutan usab nila nga mahimong legal ang nasangpit nga mga sakyanan.
Gitabangan nila kini nga makakuha ug prangkisa pinaagi sa pagmugna og kooperatiba.
Nagpahigayon usab kini ug seminar human nasuta nga kadaghanan sa mga nadakpang operators ug draybers, wala mi-agi ug tukmang seminar.
Kini ang usa ka pamaagi aron maka-apil sa modernization program sa kagamhanan.
Hugtanong gipahayag usab ni Cassion nga dili moabot sa usa ka libo ka pesos ang gasto sa pagkuha ug prangkisa ugaling musunod lang kini sa saktong proseso ug likayan ang mag fixer nga mangayu ug dagkong kantidad.
