BUTUAN CITY – Subling gitay-og ug linog ang probinsya sa Surigao del Norte kaganinang kadlawon.
Sa pakighinabi ning sibyahan, gibutyag ni Carlo Semborio sa Philippine Institute of Vulcanology and Seismology ( Phivolcs ) – Surigao, nasayran nga bandang alas- 2:57 ang takna sa kadlawon kaganina, usa ka magnitude 5.0 nga linog ang mitay-og sa 123 km North 59 degrees East sa lungsod sa Burgos, Surigao del Norte.
Human niini, laing pagtay-og na usab ang natala bandang alas-3:43 ang takna sa kadlawon kungdiin mitala kini ug magnitude 2.9 sa 92 km. North 54 degrees East sa susamang lungsod.
Samtang gisundan kini sa laing pagtay-og na usab bandang alas-5:27 ang takna kaganinang buntag, kungdiin usa ka magnitude 4.0 nga linog ang mitay-og sa 106 km North 55 degrees East sa maong lungsod.
Hinuon giklaro niini nga ang maong mga pagtay-og dili matud pa lakip sa mga aftershocks sa magnitude 6.7 nga linog nga mitay-og sa syudad sa Surigao niadtong Pebrero 10.
Kini human ilang nasuta nga lahi matud pa ang fault nga milihok kaganinang kadlawon kung itandi sa fault nga milihok atol sa makusog nga linog nga mitay-og sa syudad sa Surigao.
Sa karon, wala pa sila’y nadawat nga report mahitungod sa posibleng damyos nga dala sa maong mga pagtay-og.
