BUTUAN CITY – Balik na sa normal ang inadlaw-adlaw nga pagpakabuhi sa mga tawo sa China apil na ang pagbalik sa klase sa tanang mga junior ug senior high schools.
Sa eksklusibong interview sa Bombo Radyo Butuan kang John Lloyd Dillinger, Butuanon instructor sa usa ka international school sa Zhengzhou City sa Henan Province sa China, gipadayag niining gawasnong makalihok ang mga tawo sa ilang lugar.
Kung itandi sa Pilipinas, wala na’y gipatumang mga health measures alang sa pagpakgang sa sakit sama sa physical distancing, pagsuot og facemask ug uban pa.
Sumala ni Dillinger, sa pagbalik na sa klase sa China ilabi na sa Junior ug Senior High Schools, gitugutan na usab ang face to face interaction sa mga estudyante ug magtutudlo kansa gisugdan kagahapong adlawa.
Gidugang pa niini nga sa international school nga iyang gitudluan, duna’y pipila ka mga estudyanteng nag-adaptar sa online learning tungod kay ang iyang mga ka-ubanang magtutudlo nga nanguli sa Canada ug Estados Unidos niadtong Chinese New Year wala pa man kabalik tungod sa hugot nga restrictions nga gipatuman.
Sumala pa niini, ning nakalabay pa nga duha ka bulan mibalik sa normal ang panglihok-lihok sa China ug gipadayag niining gipatuman usab gihapon hinuon ang pagsuot og face mask sa mga pambulikong trasportasyon.
Dugang ni Dillinger, dili na mabati ang hulga sa COVID-19 sa Zhengzhou City apan tungod sa epekto sa maong virus duna gihapo’y mga establishmento nga wala pa kabalik sa operasyon tungod sa alkasi human na-apektuhan sa pandemya ang ilang kinitaan.
Gidugang niini nga gawas sa pagka-masinundanon sa mga tawo sa bisan unsang tambag sa gobyerno, duna usa’y gigamit nga Health QR code aron masayran kung diin gikan ang usa ka indibidwal butang nga nakapadali usab sa pag-contain sa virus sa maong nasud.
