BUTUAN CITY – Giklaro ni kanhi Senate President Aquilino ‘Nene’ Pimentel Jr. nga silang mga gimugnang mulangkob sa Consultative Committee, igo lang magduso og mga sugyot nga makuha gikan sa katawhang ilang libuton sa tibuok nasud.
Gibuyag niining ang kamara pa gihapon og senado nga maoy mulangkob sa Constituent Assembly kon ConAss ang dunay ‘final say’ sa pagdesisyon nila sa gihingusgang charter change kon cha-cha.
Gidugang pa niini nga sa pag-usab sa konstitusyon, dili kini angayang solohon lang sa mga representante sa ubos-balay balauranan og sa Senado tungod kay kinahanglan gihapon nilang maminaw sa mga mulo sa katawhan.
Gidugang pa sa kanhi magbabalaud nga ang konstitusyon kanunay nga pabor sa katawhan hinungdan nga dili angayang magpasagad ang tanan sa kontrobersyal karong isyu sa charter change.
Aron matud pa masegurong mahatod sa katawhan ang tinuod nga unod sa mga probisyon sa pederalismo, kinahanglang himuon ang mga public consultations nga aduna’y media coverage. (Beth Ruiz)
