BUTUAN CITY – Malampusong gipahigayon ang caravan station rally ning siyudad sa Butuan isip kabahin sa pag-selebrar sa International Women’s Day kagahapong adlawa kansa gi-apilan sa mga nagkada-iyang progresibong grupo sa pagpanguna sa Gabriela Caraga.
Sumala ni Atel Hijos, Secretary General sa maong grupo, kanunay molambigit ang sektor sa kababayen-an sa maong selebrasyon ilabina kay hangtud ning panahona, ang kababayen-an ang kasagarang mapihig sa katungod.
Sa maong kalihukan, subling gipasibaw sa grupo ang tinood nga kahimtang sa kababayen-an ilabina sa hisgutanang ubos nga suhulan.
Pagbutyag pa ni Hijos nga dinhe sa rehiyon sa Caraga, daghan nang mga dagkong kompanya apan nagpabilin sa ubos nga suhulan ang madawat sa mga trabahante tungod kaya wala gihapon nasunod ang minimum wage nga 305 pesos kada-adlaw.
Pangutana na lang ni Hijos, nganung dili man makatabang ang gobyerno sa ubos nga suhulan sa rehiyon.
Tungod matud pa niin, daghang mga Filipino ang mu-abroad bisan pa man sa nag-atang nga dakong risgo, sama nalang sa nadangatan ni Joana Demafelis nga nakaplagan nalang nga wala nay kinabuhi sulod sa freezer. (Rolan Janea)
