BUTUAN CITY – Naka-abot na kaganinang alas-otso sa buntag sa ilang hometown sa Tagbina, Surigao del Sur ang usa sa 38 ka mga namatay sa pagkasunog sa NCCC Mall sa Davao City.
Gikumpirma ni Rollen Pabelonia sa eksklusibong pakighinabi ning sibyahan nga nakagawas na unta gikan sa nasunog nga mall ang iyang 20-ayos nga igsoong si Joyne, kinsa usa ka call center agent apan mibalik kini aron pagluwas sa iyang mga ka-ubanan hinungdan nga wala na makagawas pa og balik.
Gisayangan si Rollen sa nadangatan sa iyang igsoon tungod kay mugradwar na unta kini sa kolehiyo karong Marso sunod tuig sa iya lang pagpaningkamot tungod kay usa lang ka mag-uuma ang ilang amahan.
Gani, gibayran nang daan sa biktima ang iyang tuition fee sa entiro semestre sa iyang pagtungha.
Iyang gidugang nga nahimamat nila si Pangulong Rodrigo Duterte niadtong higayon nga na-retrieve na ang patay’ng lawas sa mga biktima aron ipa-identify kanila.
Sa pagkakaron, gi-una pa nila pag-atiman ang haya sa iyang igsoon og ang pagplastar sa lubong niini adiser sila muhimo sa sunod nilang lakang.
Misaad matud pa kanila si Mayor Sarah Duterte nga mag-provide og abogado higayong gusto nilang mupasaka og kaso batuk sa tag-iya sa mall.
Kadaghanan matud pa sa kabanay sa mga nabiktima, pursigidong mupasaka og kaso batuk sa tag-iya sa mall ilabina dihang nasayran nga duna pa unta’y tsansa nga maluwas ang mga biktima kung nabakbak pa ang parte sa mall diin atua ang mga biktima. (Beth Ruiz)
