BUTUAN CITY – Gipa-ilalom na sa red alert status ang tibuok Caraga Region kondiin padayong gi-monitor sa mga Provincial Disaster Risk Reduction Management Councils kon PDRRMCs ang palibot apil na ang level sa tubig-baha aron makapahigayon gilayon og pre-emptive evacuation kung kinahanglanon.
Sigon ni April Rose Ann Sanchez – information officer sa Office of the Civil Defense kon OCD-Caraga, hugot nga monitoring ang gihimo karon sa nagakda-iyang ahensiya sa gobyerno aron makab-ot ang target nilang zero casualty.
Dugang pa ni Sanchez, duna na’y local government unit nga nagpapatupad na og pre-emptive evacuation apan wala pa sila’y gisubmiteng opisyal nga report gikan sa ilang mga provincial offices nga maoy basehan nila sa ipagawas nilang situationaire report sa bagyong Basyang
Sigon usab ni JV Pagaran – tigpamaba sa Provincial Disaster Risk Reduction Management Office kon PDRRMO- Agusan del Norte, suspendido na sugod ning adlawa ang klase sa tanang level sa pampubliko og pribadong tunghaan ning lalawigan lakip na sa siyudad sa Butuan.
Bisan ang mga local government units nag-iyahay na pagpahigayon og pre disaster risk assessment ka-uban ang mga ahensya sa gobyerno aron mapangandaman ang bisan unsa mang posibleng kadaut nga mahatod sa pagkuso-kuso sa bagyo.
Gipahinumduman usab ang mga mangingisda nga dili una magpalawod aron dili mabutang sa alanganin ang ilang kinabuhi tungod sa dagkong balud og kusog nga hanging dala ni Bagyong Basyang.
Una nang nagkansela kagahapon og klase ang lokal nga kagamhanan sa lalawigan sa Surigao del Sur gikan sa preschool hangtud sa high school nga epektibo pa gihapon karong adlawa. (Beth Ruiz)
