BUTUAN CITY – Gikondena sa militar ang brutal nga pagpatay sa rebeldeng New Peoples’ Army kon NPA ngadto sa naka-off duty nga Citizen Armed Force Geographical Unit kon CAFGU member nga mitabang og pahina sa Brigada Eskwela Program sa Barangay Lydia, sakop sa lungsod sa La Paz, lalawigan sa Agusan del Sur.
Gi-ila ni Lieutenant Colonel Romeo Jimenea, Commanding Officer sa 26th Infantry Battalion, Philippine Army ang biktimang si Felipe Amado, 42-anyos, usa ka Manobo nga residente sa Brgy Lydia.
Migawas sa ilang imbestigasyon nga tungod kay off-duty mipartisipar siya sa nagpadayong Brigada Eskwela sa Lydia Elementary School diin nagtungha ang iyang mga anak.
Pabalik na matud pa sila sa iyang mga ka-ubanan sa maong tunghaan sakay sa duha ka motorsiklo human nanguha og nipa nga gamiton sa gitukod nilang temporaryong classroom dihang gipara sila sa lima ka armadong mga lalaki sa may Comota – Lydia barangay road pasado alas-tres ning mi-aging hapon.
Base matud pa sa asuy sa mga nakasaksi, gipusil gilayon ang biktima kinsa buhi pa dayong gapos sa iyang mga kamot, gilubag ang li-og, giluba og gipusil pag-usab resulta sa iyang kamatayon.
Gitumbok ni Jimenea nga paglapas sa International Humanitarian Law ng gihimo sa NPA, tungod kay dili armado ang biktima ug nakasibilyan pa.
Andam matod pa ang pamilya sa biktima nga mupasaka ug kaso ngadto sa Commission on Human Rights aron mahatagan og hustisya ang iyang nadangatan samtang gipaneguro usab sa opisyal nga madawat sa pamilya ang fkinatibuk-ang benepisyong alang kanila samtang nagpadayon ang hot pursuit operation batok sa mga nanibat mga responsable.
