BUTUAN CITY – Gikondena sa Armed Forces of the Philippines ang ngilngig nga pagpatay sa usa sa mga gidagit nga off duty nga Citizen Armed Force Geographical Unit kon Cafgu member sa New People’s Army sa Surigao Del Sur.
Sumala kang 1Lt Jonald Romorosa- Civil Military Operations kon CMO officer sa 36th Infantry ‘Valor’ Battalion, Philippine Army, sa gilusad nga hot pursuit operation, napalgan ug narekober kagahapon sa buntag sa operating team sa Sitio Banawan Brgy. Maitum, boundary sa Lanuza ug Tandag City, Surigao del Sur, ang patay’ng lawas sa biktimang si Ryan Badiang kansa gipugutan matod pa ug ulo ug padugta na ang lawas niini.
Giklaro ni Romorosa nga usa ka paglapas sa international humanitarian law ang gibuhat sa New People Army, kini bisan paman nga membro sa CAFGU ang biktima apan base matod pa sa nakalatid sa maong balaod, dili matawag nga combatant ang biktima tungod off duty kini atol sa paghitabo ug wala kini dala nga armas.
Mahinumdumang niadtong Mayo 30 nikabat sa 7 ka civilian apil ang 2 ka minor de edad ang gidagit sa NPA ug gibuhian ang 3 niadtong Hunyo 3 samtang gidagit usab ang napalgang biktimang si Ryan Badiang.
