BUTUAN CITY – Ilubong na karong buntag ang patay’ng lawas ni 1st Lt. Mike Tuesday Tabigne, ang piloto sa Philippine Air Force kinsa usa sa upat ka mga namatay human nahagsa ang ilang gisakyang Huey helicopter sa Cauayan City, Isabela.
Kagabii, gidugok sa mga kabanay ug suod nga higala ang katapusang vigil sa patayn’g lawas sa opisyal diin gi-obserbar usab ang mga health protocols sama sa social distancing, pagsuot og face mask ug pagbutang og alcohol sa mga kamot.
Sa ekskluksibong pakighinabi sa Bombo Radyo Butuan, gibutyag ni Susana Tabigne, inahan sa biktima nga gidalikytan na sila sa mga tawo ni Pangulong Rodrigo Duterte aron ipahibalo ang mga benepisyo nga madawat nila human ang pagtaliwan sa iyang anak atol sa iyang tour of duty.
Sumala ni Susana, ang gobyerno ilabina ang Philippine Air Force na ang naghikay sa tanan gikan sa pagpahiluna ngadto na sa pagpalubong sa iyang anak nga diha sa sam-ang sa ilang barangay sa Los Angeles ning syudad.
Gihanyagan matud pa silang didto ilubong ang iyang anak sa Libingan ng mga Bayani ug sa usa ka pribadong sam-ang sa Brgy. Bancasi apan mas gipili niyang diha lang kini ilubong sa ilang brangay cemetery aron dali nila kining maduaw.
Sumala sa inahan, hatagan sila sa gobyerno og cash assistance nga 280,000 pesos ingon man housing nga ilang puy-an nga sila ang magbuot kung asa nila gusto apan mas gipili usab nilang ipa-renovate na lang sa ilang balay aron dili malayo sa ilang mga silingan ug i-encash na lang ang uban.
Gipadayag pa ni Susana nga sakit ug nagsubo sila sa iyang pamilya sa nadangatan iyang anak apan wala na silay’ mahimo kundi dawaton na lang kini dungan sa pagpadayag nga taliwa sa ilang nasinatian, nagpabilin silang positibo sa ilang paglantaw sa kinabuhi ingon man ang padayon nga pagsuporta ngadto sa uban pa niyang mga anak uban sa pagpangaliya ug pagsalig sa tanan ngadto sa Ginoo.
