BUTUAN CITY – Pinaagi sa pagdangop sa iyang mga kabanay sa Bombo Radyo Butuan, personal nga nanawagan kang Pangulong Rodrigo Duterte ang Butuanon nga domestic helper sa Kuwait nga tabangan siyang makapa-uli na sa Pilipinas.
Kini tungod sa dili maayong pagtratar sa iyang amo ngadto kaniya kondiin ang pinaka-ulahi niini nahitabo kagabii. Sigon sa overseas Filipino worker kon OFW nga si Flordeliza Sagay, residente sa Brgy, Ampayon ning siyudad sa Butuan, gikulata siya og maayo sa iyang among lalaki nga si Abdul Rakhman Mubarak Hashim Abdullah nga taga-Bayan, Kuwait, og gibira-bira pa ang iyang buhok.
Nasuko matud pa kini dihang wala niya makita ang jogging pants niini kondiin gibaharan pa siyang patyon. Dihang nakig-istorya matud pa siya sa iyang among babaye sa iyang gibating kahadlok og sugyot nga mupahawa na lang og mubalik sa ilang agency, dinhi na siya gibira sa iyang buhok, giguyod sa kusina og giwisi-wisi dayong sipa sa iyang bat-ang sa makatulo ka higayon dihang nalup-og siya sa salog.
Nasayrang ikaduhang pagpangamo na kini ni Flordeliza og tulo ka buwan pa siya sa maong nasud ilalom sa ahensyang Generik sa may M. Calo St. ning siyudad.
Dili matud pa musugot ang iyang amo nga ibalik siya sa agency tungod sa kadako matud pa sa iyang utang nga mu-abot sa 200-mil pesos.
Gidugang pa niini nga wala pa siya maswelduhi ning bulana og kabado siyang dili maswelduhan tungod kay ning mi-aging buwan, gidata-datahan lang siya sa iyang suhulan.
Hadlok matud pa siya nga masusama sa ubang mga gi-abusuhang OFWs hinungdan nga nanawagan siya ni Pangulong Rodrigo Duterte nga luwason siya gikan sa iyang amo aron makapa-uli na sa nasud. (Beth Ruiz).
