BUTUAN CITY – Giklaro sa Butuan City Police Office kon BCPO nga dili major revamp ang gipatuman sa mga dagkong opisyal sa ilang buhatan atol sa turn-over of command ceremony nga gipangunahan sa bag-ong city director nga si P/Col. Canilo Fuentes.
Sa pakighinabi sa Bombo Radyo Butuan, gipasabot ni P/Lt. Abel Bulawan, ang bag-ong tigpamaba sa BCPO nga normal movement lang sa mga opisyal ang gihimo diin idestino sila sa managahing police stations.
Nasayrang station commander karon sa Police Station 1 si P/Maj. Eunice Gonzaga nga kanhi hepe sa Women and Children’ Protection Desk kon WCPD samtang sa Police Station 2 si P/Maj. Ephraim Detuya kinsa kanhi operations officer sa BCPO ug ang kanhi tigpamaba sa BCPO nga si PCaptain Emmerson Alipit na ang station commander sa Police Station 3.
Gipadayag usab ni P/Lt. Bulawan nga usa sa pasi-unang direktiba kanila sa bag-ong city director subay sa mando sa nasudnong kapulisan ang pagpakatag sa ilang ginasakpan diha sa mga pampublikong lugar sama sa pantalan, tugpahanan, terminals, simbahan , malls, ug uban pa.
Hugot usab ang pagpatuman sa 24-hour checkpoints sa mga entry points ning syudad.
Alayon niini nanawagan ang opisyal nga katawhan nga suportahan og tabangan ang kapulisan pinaagi sa pagsumbong sa mamatikdang makadudang mga lihok ug mga tao ilabina karong holiday season.
