BUTUAN CITY – Gi-aksyunan gilayon sa Sangguniang Panlungsod sa Butuan City ang gidusong reklamo sa Bombo Radyo kalabot sa kakulangan sa supply sa Rabipur anti-rabies vaccine.
Ang maong sitwasyon nasayran lang human naglisod pagpangita og mapalitang bakuna si Bombo Kevin Linaac dihang napa-akan kini og iro niadtong paghandom sa Dominggo sa bendita lukay kon Palm Sunday.
Sa gihimong hearing ning hapuna sa Committee on Health, Nutrition and Sanitation sa Sangguniang Panlungsod, gimanduan ni committee chairman Cherry Mae Busa ang Butuan Medical Center og ang DOH-Caraga nga mag-consolidate og hospital records sa mga tawong midangop sa Animal Bite Centers nga maoy himuong basehan aron mapagawas ang 30-porsientong emergency fund sa lokal nga kagamhanan nga gamiton sa pag-purchase sa alternatibong Verorap anti-rabies vaccine.
Una nang nagpagawas og health advisory ang World Health Organization (WHO) pinaagi sa DOH kalabot sa kakulang sa supply sa anti-rabies vaccine sa tibuok kalibutan hinungdan nga gipahimangnuan ang mga pet owners nga mahimong responsable sa ilang mga binuhi. (Beth Ruiz)
