BUTUAN CITY – Uyon si Butuan City Councilor Cromwel Nortega sa gihimong pagtuon sa kongreso alang sa posibilidad nga pag-usab sa konstitusyon sa nasud.
Sa pakighinabi ning sibyahan, gibutyag ni Nortega nga dugay na ang 1987 Philippine Constitution og angayan na usab nga tun-an ang pag-usab sa pipila ka mga probisyon niini.
Apan gitin-aw niini nga gikinahanglan usab natong masayran kung unsa nga mga probisyon ang nasulod sa gihingusgang konstitusyon nga angayang usbon tungod kay supak siya nga basta-basta na lamang usab magpatuman ug mga kausaban sa konstitusyon nga wala’y klarong pagtuon.
Dugang pa niini, nga angayan gihapon nga ang katawhan ang magbuot sa kinatibuk-an pinaagi sa pagpahigayon ug plebisito kung uyon ba kining usbon ang konstitusyon sa nasud aron himuong pederal ang porma sa panggobyerno sa nasud.
Samtang gibutyag usab ni Proceso Torralba gikan sa sektor sa mga mag-uuma ning rehiyon, nga dili sila uyon sa pag-usab sa konstitusyon o Charter Change nga gisangon lamang sa mga anaa karon sa kongreso pinaagi sa Constituent Assembly kon ConAss.
Nagtuo siya nga ang mga anaa sa kongreso puro mga dagkong agalong yutaan nga hayan mupabor lang kanila ang mga probisyon sa konstitusyon nga buot nilang usbon.
Kung ipursige matud pa ang giplanuhang cha-cha, buot niini nga ipaagi kini sa Constitutional Convention kon ConCon. (Mon Aplaya)
