BUTUAN CITY – Midangop sa Bombo Radyo Butuan ang pamilya Valez aron matabangan nga mahatagan og hustisya ang ilang kabanay nga namatay ka-uban sa ihinugso unta niining anak human nga pila ka oras matud pang gipasagdan sulod sa usa ka pribadong birthing clinic.
Sigon ni Georgette Valez, pasado ala-una sa kaadlawon niadtong Marso 19, gidala sa live-in partner sa Agusan del Norte Provincial Hospital ang iyang 39-anyos nga ateng si Jocelyn Valez aron unta manganak.
Inay nga atimanon, gi-refer na hinuon sila sa usa ka nurse ngadto sa pribadong birthing clinic sa isa sa ilang mga doktor nga si Dr. Jumapao alang sa ultrasound apan na-atiman kini pasado alas-dose na sa udto dihang nakitang naluya na kini hinungdan nga gita-uran kini og oxygen.
Gi-refer na usab kini sa Butuan Medical Center pasado ala-una na sa hapon dihang makitang inapas na ang gininhawa niini, nangluspad na og nanglagom na ang pipila ka parte sa iyang paa.
Gikwestyon pa sila sa staff sa ospital tungod sa kadugay sa pagdala nila sa pasyente hangtud nga namatay na kini dihang wala na makaya pa ang iyang sitwasyon. (Beth Ruiz)
