BUTUAN CITY – Giisa sa Philippine Institute of Volcanology and Seismology kon PHIVOLCS ang Bulkang Bulusan sa Alert Level 1 kagahapong adlawa human makatala og sunod-sunod nga volcanic earthquakes sa nakalabay nga mga adlaw.
Sumala sa Phivolcs, ang Alert Level 1 nagpasabot nga anaa sa estado sa “low-level unrest” ang bulkan diin dunay posibilidad sa mga phreatic o steam-driven eruptions.
Gitaho sa ahensya nga muabot sa 475 volcanic earthquakes ang natala gikan sa Marso 15, kadaghanan hinay nga volcano-tectonic earthquakes nga hatud sa pagkabuak sa mga bato sa ilalom sa bulkan.
Sigon sa Phivolcs, ang susama kadaghan sa pagtay-og mapareha sa mga naobserbahan adiser ang mga pagbusikad sa Bulusan niadtong Hunyo 2022 ug Abril 2025.
Gawas sa seismic activity, nakatala usab ang Phivolcs og pagsaka o inflation sa kasadpang parte sa bulkan sa ulahing semana sa Enero, ug sa habagatang-sidlakan parte sa unang semana sa Marso 2026.
Samtang nagpabiling hinay hangtud sa kasarangan ang degassing activity gikan sa mga aktibong ba-ba. Natala ang sulfur dioxide emission nga anaa sa 91 ka tonelada kada adlaw niadtong Marso 17 mas ubos kaysa sa kasagarang lebel.
Sumala sa Phivolcs, ang kombinasyon sa mga niini mamahimong indikasyon sa mabaw nga hydrothermal processes, nga posibleng maghatud sa kalit nga pagbusikad sa bisan asang ba-ba sa bulkan.
Hugot nga gitambagan sa Phivolcs ang mga lokal nga kagamhanan ug residente nga ibawal ang pagsulod sa loob sa 4-kilometrong Permanent Danger Zone (PDZ) sa palibot sa bulkan.
