BUTUAN CITY – Opisyal nang nahimong kabahin sa Philippine Navy ang BRP Diego Silang (FFG-07), ang pinakabag-o ug labing abanteng guided-missile frigate sa nasud human gipahigayon ang arrival ceremony kagahapong adlawa, Septemre 15 sa Naval Operating Base sa Subic, Zambales.
Gipangunahan kini ni Armed Forces of the Philippines (AFP) Chief of Staff General Romeo Brawner Jr. uban ni Philippine Navy Flag Officer in Command Vice Admiral Jose Ma. Ambrosio Ezpeleta.
Nasayrang si Capt. John Percie Alcos maoy magsilbing commanding officer sa bag-ong barkong panggubat sa Pilipinas.
Sa iyang mensahe, gibutyag ni Gen. Brawner nga ang maong barko mao’y simbolo sa katuyoan sa Pilipinas nga mapanalipdan ang tanang katigayunan niini dayong saad nga barugan ang soberanya, bisan unsa pa man ang mga hagit nga masugat.
Nagpakita usab kini sa ka-andam sa Pilipinas nga panalipdan ang interes ug kaayohan sa katawhan.
Sigon sa Philippine Navy, ang pag-abot sa BRP Diego Silang nagpasabot sa nagpadayong pagpangusog ug modernisasyon sa kusog, ilabina sa ilang mga naval assets.
