BUTUAN CITY – Gi-andam na ang mga kasong atubangon sa tulo ka mga gibansagang high value targets (HVTs) sa Philippine Drug Enforcement Agency kon PDEA Caraga human nagpositibo sa gihimong drug test pasado alas-8:15 ning mi-aging gabi.
Sigon ni Dindo Abellanosa, tigpamaba sa PDEA-Caraga, parehong nadakpan sa ilang gihimong high impact operation sa surfing capital sa Siargao Islands sa lalawigan sa Agusan del Norte ang usa ka British national, usa ka registered nurse og usa ka barangay kagawad sa may Brgy. Poblacion 5 sa lungsod sa General Luna, sakop maong isla.
Gibana-banang mukabat sa 500-gramos nga marijuana nga nagkantidad og 12,500-pesos ang nakumpiska sa kapulisan gikan sa mga drug den maintainers nga gilangkuban nila British national Liam Cox, ka-ubanan niining si Kirby Clet usa ka registered nurse dinhi sa Pilipinas og Australia nga miyembro usab sa Delgado drug group og Raul Dycueco, kagawad sa Brgy. 4 lungsod sa Dapa sakop usab sa maong isla.
Dugang pa sa opisyal, gigamit matud pang drug den ang balay sa nurse nga si Clet nga maoy subject sa gipagawas nga search warrant og ka-uabn sa nadakpan ang bisita nilang si Rolf Jingle Congreso
Sigon ni Abellanosa, mag-atubang sila og mga kasong paglapas sa Sections 6, 7, 11, 12 og 15 sa Republic Act 9165 dungan sa p agbutyag nga maghatag matud pa og dakong epekto ang maong operasyon sa drug situation sa Siargao Island ilabina sa lungsod sa General Luna nga maoy surfing capital sa Pilipinas. (Beth Ruiz)
