BUTUAN CITY – Gi-ila sa usa ka banggi-itang komentarista sa Visayas og Mindanao area ang Bombo Radyo Philippines isip ‘broadcast academy’ sa Pilipinas.
Kini ang pag-ila ni Carlo Dugaduga, ang pinaka-unang station manager sa Bombo Radyo Butuan kinsa nalabay na sa ubang mga media entities sa nasud og ingon man sa government service, sa iyang pagdalikyat sa Bombo Radyo Butuan.
Gibutyag ni Dugaduga nga dili malimod nga sa halos tanang lugar sa tibuok Pilipinas diin anaa ang mga sibyahan sa Bombo Radyo, ang mga sikat nga radio personalities pulos duna’y Dugong Bombo kansa nagpasabot nga gi-umol ang ilang katakos og abilidad sa pagpanibya diha sa mga sibyahan sa Bombo Radyo.
Bisan kadtong aktibo na karon sa laing field sa ilang career nga nag-excel, makutay gihapon ang ilang gigikanan sa Bombo Radyo.
Dili malimtan sa kanhi station manager ning sibyahan ang pagpahigmata sa katawhan ning siyudad sa Butuan og sa tibuok Caraga Region sa ilang katungod nga masayod sa mga nagapanghitabo ilabina sa kalihukan sa mga lokal nga opisyal.
Ang pag-abot sa Bombo Radyo dinhi sa dakbayan sa Butuan ang hinungdan nga daghang mga opisyal sa gobyerno ang naligsan kon nahimong sentro sa hisgutanan sa kahanginan tungod sa ilang hiwi nga mga binuhatan.
Ang kawsa nga gitamdan ni Bombo Carlo Dugaduga maoy hinungdan nga dili malimtan sa tanang mga tigpaminawan ning sibyahan nga naka-abot sa iyang panahon, ang sikat niining saga nga gisundog na sa ubang mga sibyahan. (Bombo Beth)
